"Call to Action"

   Vaajtswv tug kws tsim ntuj tsim teb yog ib tug “personal God” kws txawj, ntse, muaj fwjchim, paubtaab, hab ua tau txhua yaam hab Nwg yog ib tug Vaajtswv kws muaj num ua los yog “action” hab Nwg tsi yog ib tug Vaajtswv kws muaj qhovmuag los tsi pum kev, muaj pobntseg los tsi nov, muaj qhovncauj los has tsi tau lug, hab muaj teg taw los ua tsi tau num. Lub ntuj nuav yog Vaajtswv tsim lug ua num rua Vaajtswv lawv le Nwg pluaj sab kuas tav rua Tswv Yexus, Nwg leej Tub, ua Vaajtxwv kaav huv lub ntuj tshab yaav pegsuab. Nwg tsi yog ua rua koj hab rua kuv. Peb yog Vaajtswv cov tubkhai kws raug xaiv lug ua Vaajtswv teg num nuav kuas tav rua Tswv Yexus. Num yog ib yaam yuav tau ua, tsi yog yaam yuav muab ncua ca hab tog. Yog le ntawd peb txhua tug kws raug hu lug ua Vaajtswv teg dlejnum qhov num yog ua (action).

    Tsi yog Vaajtswv tsi muaj cuabkaav ua Vaajtswv teg dlejnum hab Nwg yuav vaam peb paab, tabsis Nwg xaav siv peb saib peb puas ncaajnceeg rua Nwg. Yog le ntawd kev nqeg teg ua num (action) yog ncaajnceeg rua Vaajtswv. Kev ntseeg yog ib yaam zoo kws txhua tug yuavtsum muaj, tabsis kev ntseeg yog yaam coj yug moog cuag tau Vaajtswv hab lub fwjchim kws Vaajtswv nrug yug nyob xwb, nwg tsi yog yaam kws yuav ua rua num tav. Txuj kev ntseeg kws tsi muaj num yog txuj kev ntseeg tuag los yog tsi tseeb le Vaajtswv pum hab suav has tas yog kev ntseeg.

     Kev thov Vaajtswv yog dlua ib yaam kws cov ntseeg tsimnyog xaav hab ua tuabzoo saib. Peb thov Vaajtswv, Nwg yeej nov hab paub, tabsis txuj kev thov Vaajtswv kws tsi muaj leejtwg ua num, yuav tsi muaj dlaabtsi tav. Thaus peb thov Vaajtswv, muaj ib teg num yog Vaajtswv ua, tabsis muaj dlua ib teg num yog Vaajtswv muab lug rua peb ua. Yuav yog txhua yaam kws peb thov yog yaam Vaajtswv ua, peb txhaj tau. Yaam kws Vaajtswv muab rov lug rua peb ua hab tsi ua, yaam ntawd tsi tav, xob kam Vaajtswv.

    Dlejnum, tsi has yaam twg muaj npe saib dlaabtsi yog dlaabtsi, nwg siv sijhawm, nyajtxag, kev txawjntse los yog cuabkaav, hab tuabneeg. Npaaj hab tswj txhua yaam nuav moog lawv le tsimnyog, peb cov num txhaj yuav tav. Cov tuabneeg kws ua num nub twg hab xyoo twg los ua le qub, tsi hloov, yog cov kws ua num yuav yaam khoom qub, tsi pub txawv. Yog peb txaus sab rua peb pawgntseeg le taamsim nuav peb pum hab tau, ua cov num qub, tabsis yog peb xaav kuas tej ntawd hloov los yog zoo dlua qub, peb cov num yuav tau ua yuavtsum yog cov tshab (focus on the cause not the effect).

    Dlejnum huv pawgntseeg yog sab-ntsws, dlaagzug, nyajtxag, hab tuabneeg. Yog yuav ua tuabzoo saib, nwg yog num tuabneeg hab lub sab, tsi yog “project or program.” Koj muab tau tuabneeg lub sab, nyajtxag hab dlaagzug tawm tuaj, koj ua rua tuabneeg tu sab hab chim, txawm “project hab program” zoo los yuav tsi muaj tuabneeg tuaj koom.

    Yaam kws peb coj, peb has, hab peb qha yuav tsi hum tuabneeg lub sab, tabsis yaam twg yog Vaajtswv le, tsi muaj leejtwg yuav caav, nyom, hab sawv lug tawmtsaam. Cov ntseeg yog ntseeg Yexus, tsi yog ntseeg tug xwbfwb los yog cov thawjcoj, puab muaj nyaj, siv sijhawm, hab koom yog nrug Yexus, tsi yog nrug tug thawjcoj los yog tug xwbfwb. Has Vaajtswv lug, coj Vaajtswv cai, hab ua Vaajtswv num luas txhaj nrug koj ua.

   “Call to action” muaj ob yaam, ib yaam yog tawm moog saabnrau hab muaj ib yaam yog lug rua saab huv. Yaam nuav, yaam kws hloov hab ua tau num zoo yog yaam lug rua saab huv, tsi yog yaam tawm moog rua saabnrau. Tug thawjcoj hloov nwg tugkheej saab huv, lwm yaam yuav hloov thaus tawm moog rua saab nrau. Yog le ntawd “take action” lug hloov koj txhua yaam kuas zoo uantej lwm yaam kws koj coj yuav hloov moog rua qhov zoo.

Kx. Xeev Neeb
Thawj Tsaavxwm HKM