Nyob zoo Christmas 2012 hab Xyoo Tshab 2013

Ua Vaajtswv tsaug rua Nwg txuj kev hlub kws muaj pub rua tuabneeg nplajteb kws luj tshaaj txhua yaam kev hlub hab qhov ntawd yog Nwg leej Tub Tswv Yexus kws lug ua noobneej tug Cawmseej hab yug rua lub sijhawm nuav. Tuabneeg nplajteb, txawm tsi paub Vaajtswv hab totaub Nwg pluaj sab los yog teg num kws Nwg ua los lub caij nuav ua koobtsheej rua nub yug Yexus thoob ntuj. Yexus teg num tsi yog lug tsim kaablig kevcai los yog “culture” rua suavdlawg siv, tabsis yog coj kev Cawmdlim lug rua suavdlawg tau txais.  Ca lub “Christmas” nuav ua rua koj paub has tas muaj kev Cawmdlim rua koj, yog koj tsi tau txais, tabsis yog tau txais lawm, paub has tas lub ntuj tshab kws Vaajtswv npaaj rua Yexus kaav yog koj tug hab koj yuav tau moog nyob thaus txug sijhawm.

Yaam kws txaus sab tshaajplawg rua koj yog lub xyoo 2013, yog koj muaj Yexus ua Tswv Cawmseej lawm; qhov ntawd yog Vaajtswv yuav nrug koj nyob hab foom koobmoov rua koj moog ua koob ua moov rua lwm tug. Vaajtxwv pumzoo hab xaiv koj lug ua Vaajtswv ib tug mivnyuas, Nwg pluaj sab yog muab koj hloov los yog yug dlua tshab lug ntawm saab ntsujplig kws ua rua koj nyam txuj kev zoo hab xaav ua zoo. Qhov ntawd yog ca Vaajntsujplig tug kws nyob rua huv koj lub sab coj hab qha koj ua neej. Xyoo nuav kev hlub yuav tawm huv koj tuaj, koj yuav qaabsab ua neej, muaj kev thaajyeeb, ua tau sabntev, taabncuab lwm tug, muaj lub sab zoo, coj tau ncaaj, muaj lub sab muasmog, hab tswj tau tugkheej. Lub ntuj le tej tebchaws yuav tsi muaj ib txuj cai khi tau koj los yog thuam tau koj has tas yog tug tsi zoo. Koj yog Vaajtswv tug mivnyuas kws tsi yog has tau ntawm lub ncauj, tabsis muaj lub sab zoo le Vaajtswv hab coj tau Nwg txuj cai qha tuabneeg has tas Vaajtswv muaj tseeb hab yog Vaajtswv tug zoo.

Thov Vaajtswv foom koobmoov rua mej txhua tug,

Kx. Xeev Neeb

Thawj Tsaavxwm HKM

DS NEWS (click here)

Thawj Tsaavxwm le xuvxwm (nyem nuav)