HMONG VERSION

C&MA 11 NQAI KEV NTSEEG

Xyoo 1965, C&MA tau saablaaj tawm suab pum zoo yuav hab coj 11 nqai kev ntseeg le nraag nuav:

1. Muaj Vaajtswv tuableeg yog tug Dlawbhuv kawg nkaus, hab Nwg yog tug kws ibtxim muaj nyob kws koom 3 lub npe: Vaaj Leejtxiv, Vaaj Leejtub, hab Vaaj Ntsujplig tug Dlawbhuv.

2. Yexus Khetos yog Vaajtswv hab nqeg lug yug ua tuabneeg. Vaaj Ntsujplig tug Dlawbhuv lub fwjchim ua rua Malis tug kws yog nkaujxwb xeeb hab yug Yexus. Yexus yog tug ncaaj nceeg kws lug tuag theej tuabneeg lub txim sau tug ntoo khaublig; Nwg ua tug mivnyuas yaaj kws raug tua fij theej tuabneeg lub txhoj. Tug kws ntseeg Yexus, Yexus cov ntshaav yuav ntxuav tug ntawd tej kev txhum kuas taag moog. Vaajlugkub qha tseg has tas Yexus tub sawv huv qhov tuag rov qaab lug lawm hab moog nyob ntawm Vaajtswv tug muaj fwjchim saab teg xis ua peb cov ntseeg tug povthawj hlub. Mua jib nub tomntej nuav Nwg yuav rov qaab lug tsim khu Nwg lub tebchaws kuas ncaaj nceeg hab thaajyeeb.

3. Vaaj Ntsujplig yog tug Dlawbhuv, raug xaa lug paab peb, ua tug qha hab coj peb txuj hauvkev, hab yog tug pub fwjchim rua txhua tug ntseeg hab yog tug qheb tuabneeg lub sab kuas pum txug kev txhum, pum txug kev ncaaj nceeg hab kev txavtxim yaav tomntej.

4. Phoo Vaajlugkub Qub hab Phoo Tshab, txij thaus chivkeeb lug yeej tsi muaj ib lu lug yuamkev, yog Vaajtswv tshoov cov sau lub sab, hab yog Vaajtswv qha txug tuabneeg txujkev dlimtxim kws Vaajtswv tau teem tseg lawm. Ob phoo ntawv nuav yog Txujlug tseeb kws Dlawbhuv hab yog txuj kevcai rua cov ntseeg cojj hab xyum ua lub neej lawvle ntawd.

5. Thaus chivkeeb Vaajtswv tsim tuabneeg zoo le Vaajtswv tug yaamntxwv. Tabsis tuabneeg tsi noog Vaajtswv lug tuabneeg txhajle poob rua txujkev txhum lawm. Txij thaus ntawd lug tuabneeg saab cevnqaj dlaimtawv hab saab ntsujplig txhaj le tuag. Txhua tug tuabneeg kws yug lug ntawm txujkev txhum yeej raug cais tawm ntawm Vaajtswv lawm. Tug kws yuav dlim tau nwg lub txim nuav yuav tsum ntseeg Tswv Yexus tug kws lug tuag theej tuabneeg lub txhoj xwb. Tug kws tsi leeg txim hab tsi kaam lug ntseeg tug ntawm yuav raug kev txomyem moog ibtxhis. Tabsis, tug kws ntseeg yuav tau zoo nyob kaaj sab lug moog ib txhis.

6. Tswv Yexus tub muab txujkev dlim txim rua txhua tug tuabneeg lawm. Cov kws leeg kev txhum hab txais yuav Yexus yog cov kws yug dlua tshab ntawm Vaajtswv tug Ntsuplig kws Dlawbhuv. Vaajtswv yuav pub txujsa ntev ibtxhis rua nwg hab yuav pub nwg muaj feem lug ua Vaajtswv mivnyuas.

7. Vaajtswv dlejsab xaav kuas tug ntseeg muaj lub neej puv npo Vaaj Ntsujplig, ca Vaaj Ntsujplig muab nwg ntxuav kuas dlawbhuv. Tsi xob ua txhum le tuabneeg nplajteb ua, tabsis nwg yuavtsum fij nwg lub neej rua Vaajtswv, hab ua lub neej kuas hum Vaajtswv sab nyam nwg txhas yuav tau Vaajtswv lub fwjchim lug paab nwg, hab ua tau tegnum tawg paaj txivtxiv. Nuav yogi b txujkev kws ib tug ntseeg yuav tsum muaj hab yuav tau xyum ua thaus nwg txais yuav Yexus ua nwg tug Tswv lawm.

8. Yexus Khetos muaj cuabkaav khu tej kev mob kev nkeeg kws raug rua tuabneeg lub cev kuas zoo. Kev thov Vaajtswv hab muab roj pleev tug muaj mob yeej qha nyob rua huv Vaajtswv Txujlug hab yog ib tegnum tseemceeb rua cov ntseeg kws nyob tam nuav.

9. Pawg ntseeg yog cov ntseeg Tswv Yexus kws raug ntxuav lug ntawm Yexus cov ntshaav, hab yug dlua tshab ntawm Vaajtswv tug Ntsujplig Dlawbhuv. Yexus yog lub taubhau ntawm lub cev. Pawg ntseeg yog cov kws Vaajtswv saamfwm kuas tawm moog ua timkhawv qha Txuj Moo Zoo rua txhua tsaav tuabneeg huv nplajteb. Pawg ntseeg yog lub cev ntawm cov ntseeg Yexus kws tuaj txoos uake pehawm Vaajtswv, noog Vaajtswv Txujlug kws khu tau tuabneeg lub sab, thov Vaajtswv uake, tshaajtawm Txuj Moo Zoo, tuaj koom sab ua kevcai rausdlej, hab noj Yexus Rooj Mov.

10. Txhua tug kws ntseeg hab tsi ntseeg yuav sawv huv qhov tuag rov lug; cov ntseeg xub sawv rov lug moog txais txujsa ntev moog ibtxhis; cov tsi ntseeg yuav sawv tomqaab lug moog raug txujkev txavtxim.

11. Tswv Yexus yuav rov lug zag ob. Txhua tug yuav pum Nwg, hab Nwg yuav lug kaav lub nplajteb nuav ib txheeb xyoo. Qhov nuav yog cov ntseeg kev casab, hab yog ib lub ntsablug tseeb kws ua rua cov ntseeg kub sab ua lub neej dlawbhuv hab mob sab ua Vaajtswv dlejnum.