Tej zag koj yuav has tas kuv tub lug ntseeg Vaajtswv
tau ntau lub xyoo nuav es koj tseem nug kuv has tas kuv puas tau lawb dlaab
taag? Tseeb tag, tej zag koj yuav lug ntseeg Vaajtswv ntev lawm, tabsis sov
koj puas tau lawb dlaab taag. Noog zoo, kuv tsi tau has tas koj puas tau
lawb dlaab tabsis kuv has tas koj puas tau lawb dlaab taag. Koj puas tau
lawb txhua tug dlaab huv koj lub neej?
Vim le caag kuv nug koj le ntawd? Muaj ib yaam kws
pheej nyob huv kuv lub sab hab ua rua kuv tsi muaj lub sab kaaj yog peb Moob
lub neej ntseeg Vaajtswv. Vaajtswv hlub Moob hab hu Moob lug ntseeg
Vaajtswv, tabsis nub kws Moob lug ntseeg Vaajtswv lawm los Moob tseem tshuav
ntau yaam kws Moob tsi kaam muab tso povtseg. Yog muab has lug tes Moob lug
ntseeg Vaajtswv, tabsis Moob tsi kaam muab Moob cov dlaab lawb kuas taag.
Tseeb tag, Moob yuavtsum lawb dlaab lawm es Moob txhaj lug ntseeg tau
Vaajtswv, txawm le ntawd los Moob tsi tau lawb Moob cov dlaab taag lawv le
kuv pum (Koj nyeem moog koj yuav pum has tas Moob cov dlaab kws kuv has yog
dlaabtsi). Yog Moob lub neej ntseeg Vaajtswv zoo le nuav xwb ntuj ceebtsheej
puas yuav yog Moob tug?
Tswv Yexus has tas, "qhov tseeb yuav paab tau koj
dlim". Thaus peb paub qhov tseeb lawm peb yuav dlim ntawm dlaab Ntxwgnyoog
txujkev dlaag. The truth will set you free.
