Peb Yog Vajtswv Txhais Tes Puab

"Vaajtswv tsim peb ibleeg zoo txawv ibleeg tabsis peb txhua tug puavleej muaj txhajntsig rua Vaajtswv siv." Romans 9:20-21 

Zoo sab tau tuaj ntsib cov vivncaug Namtsev suavdlawg nyob rua ntawm tsaab ntawv nuav.

Nyob rua huv tsaab ntawv nuav, kuv yuav has txug 3 yaam tseemceeb le nuav:

1.       Vaajtswv Tsim Peb Ibleeg Zoo Txawv Ibleeg:

(Yaxayas 64:8) tau qha has tas, Vaajtswv yog tug puab peb ib yaam le tug tuabneeg kws puab aav nplaum, Nwg puab tej lub laujkaub aav lossis tej lub hub aav lawv le Nwg lub sab nyam, Nwg yuav puab tej lub luj tej lub yau hab zoo tsi sis thooj los txhua lub hub lossis lauj kaub aav ntawd puavleej muaj homphaj (purpose) lug rua Nwg tau siv.

20 Phoojywg, koj yog leejtwg, ua le caag koj tseem nrug Vaajtswv sis caav hab?  Lub laujkaub aav yeej tsi has rua tug kws puab laujkaub has tas, “Ua caag koj puab kuv zoo le nuav?”   21 Tug kws puab laujkaub nwg yeej muaj cai muab aav lug puab laujkaub lawv le nwg lub sab nyam.  Nwg muab tuab thooj aav lug puab ib lub zoo ib lub phem los nyob ntawm nwg pum zoo.  (Loos 9:20-21)

Nqai Vaajlugkub nuav tub qha rua peb has tas, Vaajtswv tsim peb ibleeg zoo txawv ibleeg tabsis peb txhua tug puavleej muaj txhajntsig rua Vaajtswv siv.  

2.      Vaajtswv Muaj Homphaj Siv Peb Txhua Tug:

Vaajtswv pub peb nyag muaj nyag ib txuj koob moov lawv le Vaajtswv tub npaaj sab pum zoo yuav siv lawm.

Nyob rua huv phau Vaajlugkub (Loos 12) tau qha le nuav:  ⁶ Vaajtswv pub peb txhua tug nyag muaj nyag koob moov lawv le Vaajtswv pum zoo pub rua peb lawm. Yog peb tau txuj koob moov kws qha Vaajtswv txujlug, peb yuavtsum qha lawv le peb txujkev ntseeg; ⁷ yog peb tau txuj koob moov paab lwm tug, peb ca le paab; yog peb tau txuj koob moov qha, peb ca le qha;  ⁸  yog peb tau txuj koob moov txhawb lwm tug zug, peb ca le txhawb. Tug kws muaj qhov txhua chaw paab lwm tug, tug ntawd yuavtsum muab ntawm lub sab dlawb paug; tug kws ua thawj coj, yuavtsum muab sab rau ua num; tug kws ua sab dlawb sab zoo rua lwm tug, tug ntawd yuavtsum ua ntsejmuag luas quas ntxhi.  (Loos 12:6-8)

Ca peb tshuaj saib leejtwg tau txuj koobmoov ua yaam twg los peb ca le ua, vim tas peb txhua tug kws ntseeg Tswv Yexus, peb puavleej nrug Nwg koom uake ib yaam le peb lub cev yeej muaj teg muaj taw muaj sab muaj ntsws nyag ua yag teg num mas lub cev txhaj le luj hlub.

Peb tsi xob xaav has tas caag Vaajtswv tsi siv yug ua yaam kws yug nyam hab xaav ua.  Yog tag, Vaajtswv kuj siv yug ua yaam kws lwm tug tsi xaav ua hab.  Ca peb muab peb lub neej rua Vaajtswv siv lawv le Nwg pum zoo.

¹⁰ Peb yog cov kws Vaajtswv txhais teg puab.  Vaajtswv tsim peb lug nrug Yexus Khetos koom ib txujsa, kuas peb ua tau tej num zoo kws Vaajtswv tub xub npaaj tseg ca rua peb ua lawm. (Efexus 2:10)

3.      Vaajtswv Tub Npaaj Nqe Zug Ca Rua Peb Lawm:

Nyob rua huv phau Vaajlugkub (Kalatias 6) tau qha rua peb le nuav:  ⁹ Yog le ntawd, peb tsi xob nkeeg ua tej num zoo; yog peb pheej ua tsi tso tseg, muaj ib nub peb yeej yuav tau sau xwb. ¹⁰ Txhua lub sijhawm kws peb paab tau lwm tug, peb yuavtsum paab, tabsis peb yuavtsum paab cov ntseeg heev dlua.  (Kalatias 6:9-10)

Vaajtswv tub npaaj nqe zug tseg ca rua peb txhua tug lawv le teg dlejnum kws peb tau ua lawm, tabsis tsi yog peb ua dlejnum kuas peb dlim.  Qhov kws peb dlim yog vim peb ntseeg tug Tswv Yexus, tabsis qhov kws peb ua dlejnum yog peb ncu Vaajtswv tej txajntsig kws Nwg tau tuag txhwv peb dlim lawm xwb.  Txawm le ntawd los Vaajtswv yeej yuav muab nqe zug rua peb lawv le teg dlejnum kws peb ua.

¹² Yexus has tas, “Mej ua tuab zoo noog kuv tej lug!  Kuv tub yuav lug sai sai nuav!  Kuv yuav coj kuv tej nqe zug lug, kuv yuav muab rua mej txhua tug lawv le teg num kws mej tau ua lug lawm. (Tshwmsim 22:12)

Xaus Lug:

Cov vivncaug suavdlawg, Vaajtswv yog tug kws puab peb zoo yaam le tug kws puab tej laujkaub aav.  Txhua lub haujkaub aav ntawd luas yuav muab siv le nuav:  Muaj qee lub luas yuav siv rau dlej, muaj qee lub luas yuav siv rau cawv txivmaab, muaj qee lub luas yuav siv rau roj, muaj qee lub luas yuav siv rau moov nplej, muaj qee lub luas yuav siv rau tej saw nyaj saw kub, muaj qee lub luas yuav siv rau aav ca cog tej paaj kws tawg zoo nkauj, muaj qee lub luas yuav muab txawb ca rua ntawm tej rooj rua tuabneeg saib xwb. 

Yog Vaajtswv pumzoo siv peb leejtwg ua yaam dlaabtsi los ca peb txaus sab ua, tsi xob ywg hab tsi xob muab peb teg num coj moog pev rua lwm tug teg.  Vaajtswv pub peb ib leeg txawj lawm ib yaam kuas peb txhaj le sis paab tau.  Tej num zoo kws peb ua ntawd yuav ua rua Vaajtswv tau koobmeej.  Thov Vaajtswv foom koobmoov hab nrug nraim peb cov vivncaug suavdlawg kuas ua tau yaam zoo lawv le Vaajtswv tug dlej sab.

---

N.Kx. Num Yig Hawj (Paaj)

N. Kx. Num Yig Hawj nyob rua lub nroog Kansas City, Kansas.  Nwg lub npe hluas hu ua Paaj, yog xeem Moob Muas.  Nws tuaj tebchaws America nuav xyoo 1978, Vaajtswv tau coj nkawv ob namtxiv tuaj sis ntsib nyob rua lub nroog Houston, Texas hab tau sis sau ua txwjnkawm rua thaus lub xyoo 1978 yuav xaus ntawd.  Vaajtswv tau foom koobmoov rua nkawv muaj 13 leeg tub hab ntxhais uake (muaj 7 leej ntxhais hab 6 leej tub.  Nyob rua ntawm wb cov mivnyuas nuav, muaj 3 nkawm yog mivnyuas ntxaib – ib nkawm ntxais hab ob nkawm tub, taamsim nuav wb muaj xeebntxwv taagnrgo yog 28 leej).  Tej yaam kws nwg nyam ua yog ua noj ua haus, ua ntaub xuv-paaj (crochet), moog ncig saib vaaj paaj, ncig saib roob saib haav, moog koom nrug cov namtsev ua Vaajtswv dlejnum hab paab cov tuabneeg kws raug kev txomnyem. Dlua le nwg nyam nrug nwg tug quasyawg caij motorcycle hab moog ua Vaajtswv dlejnum rua txawv tebchaws. Lub sijhawm kws Kx. Ntxoov Xeeb Yaaj tseem ua Thawj Tsaavxwm ntawd, nwg tau sawvcev Hauvpaug Koomhum Moob (Hmong District) hu nkawv moog ua xibfwb thaus xyoo 1988 lug txug rua lub sijhawm nuav (38 lub xyoo lug  lawm).  Yog ib txuj koobmoov kws Vaajtswv tau hu nkawv hab nkawv cov mivnyuas moog ua Vaajtswv dlejnum xwb, txawm yog ntsib kev txomnyem hab ntsib ntau yaam kev nyuaj los Vaajtswv tsi tau tso puab tsev tuabneeg tseg.